Una de les tradiciones más asociaes a les fiestes de San Xuan ye el enrame de les fontes. Dende va dos años, delles de les fontes del conceyu viniéronse enramando gracies a la llabor desinteresá de los miembros del Grupu Folclóricu L' Artusu.
Falamos sobre esta tradición cola so directora, Ángeles Nespral, que nos desvela qu'esti San Xuan el enrame de les fontes va a tener tovía más protagonismu.
"Queremos concienciar a los vecinos de lo importante d’esta tradición onde convidamos al agua y al fueu a llimpianos, sananos… San Xuan y la so nueche son maxa"
–El Grupu L'Artusu vela pol baile y el folclor tradicional. Nesti últimu podríemos enmarcar la tradición del enrame de les fontes. ¿En qué consiste? ¿Por qué ye dalgo tan estrechamente ligao a les fiestes de San Xuan?
L’ enrame de les fontes consiste n’ engalanar con flores y verde los caños de les fontes y llavaderos.
Celébrase la entrada del solsticiu de branu, onde la naturaleza ta en plenu esplendor. Facelo na nueche de San Xuan, onde la maxa ye la gran protagonista, onde sanamos, llimpiamos ya inclusive renacemos col fueu y l’ agua, ye facelo na nueche más propicia
 |
| Miembros del grupu trabayando coles flores n'una semeya d'archivu |
–Suponemos que cortar les flores ye ‘l primer pasu d’ esi procesu d’ enrame. ¿D’ ónde saquen eses flores?
Les flores tán per toles partes y ye gracies a la collaboración de vecinos, collacios, familiares… que tiénenles nes finques y xardines de les sos cases. Hai dalgún añu que debíu al clima, bastante inestable por ciertu nesta época del añu, nun atopamos suficientes. Si ye verdá que los menos y tenemos que dir a una floristería a mercar flores variaes.
–¿Val cualquier tipu de flor? ¿Hai dalgunes que se presten meyor qu’ otres?
Val cualquier tipu de flor, anque tenemos especial interés na que se denomina La flor de San Xuan, porque florez nesta época. N’ Asturies munchos setos de cierre de xardines, praos y demás tán fechos con un arbustu conocíu nel centru d’ Asturies por San Xuan y da una flor blanca pequeña conocida por San Xuanín. Esta ye la que‘l grupu L´Artusu utilizamos dende años pa enramar, asina como nos enseñaron les muyeres d’ Insierto, que foron quienes nos deprendieron a facelo al traviés de Charo, una vecina que ye componente del grupu.
Esto nun quier decir que nun sirva otra flor y ramaxe; podría facese perfeutamente con xabú y la so flor, tamién en plenu esplendor nesta época.
Pa dar un pocu de color a estes fontes podemos utilizar flores de la zona: cales, roses y actualmente muncha hortensia, flor que se da perbién en’Asturies y que cada vez usamos más pola so diversidá de colores y tamaños.
 |
| Les fontes d'El Vasco y El Fuerte, enramaes nel 2020 |
–¿Cómo ye ‘l procesu de preparar los ramos? Imaxinamos que la tarde del 23 de xunu debe ser intensa…
Más bien la mañana del 23 ¡ye más intensa! A les 8 de la mañana ya sal un grupu de componentes en busca del San Xuan perfeuto; fainos falta dos tipos, un que ye más arbustu y florez y otru que tien rames llargues y llises y nun tien flores.
Córtase temprano pa que te húmedu y frescu y aguántenos tol día. Durante tola mañana, hai muncha actividá nel centru social de Figaredo, nel salón d’ actividades de la asociación de vecinos, onde enriba d’ unes meses grandes (tableros) entamamos otra cuadrilla de trabayu a preparar y separar el material. Nun paren de llegar familiares y collacios con cestes enllenes de hortensies, roses, cales, margarites… tolo que pudo atopar.
Una vez que se tien tol material a mano, ponémonos a facer tires, corones, centros... Tou a demanda de les fontes que van enramase.
–Vimos que faen, incluso, ramos con forma redondeada. ¿Cuántu tiempu pue llevar preparar un ramu d’ estos?
Bueno, depende de la experiencia que tengas de facelos, ja ja... La xente veterana que llevamos años, pue llevanos entre 10 o 15 minutos facela (depende del tamañu, diámetru, grosor). Si tas entamando... Ye normal que se desarme, enriédese'l filo o cordel y tardes dalgo más. Pero hai que dir enseñando a la xente a facelo, colo que contamos con tola mañana… Y siempre tuvo tou llisto a tiempu.
Dos de les fontes de Villar de Gallegos, enramaes nel 2020
–En 2021 enramaron fontes como les de los llavaderos de La Peña, Cardeo o Ablaña. ¿Qué fontes esperen enramar nunos díes?
Cuéntovos un pocu lo d’ enramar eses fontes. Nestos dos años de pandemia y sobremanera fae dos xustos, onde tábémos arrodiaos de restricciones y prohibiciones y onde taba prohibío reuniones de más de 10 persones decidimos que, en grupos reducíos y un pocu por sorpresa por si nos decíen que non, emperexilar les fontes de Mieres, la del Vasco y la del Fuerte teníen que amanecer enrames en San Xuan.
Foi entós, como nun había muncha normalidad pol COVID- 19, onde per whatsapp, ya que nun teníamos ni siquiera ensayos, organicémonos pa enramar les fontes o llavaderos más cercanos a onde vivía o s’atopaba la mayoría de la xente del grupu. De tal manera qu’ en Figaredo hubo fontes enramaes, nel Pedroso, Cenera, Cuna, Vil.lar de Gallegos, el Vasco, el Fuerte nel centru urbanu… y llueu, por supuestu, enramóse La Villa, La Peña, Ablaña; llegando a contar sobre 20, axuntando les enramáes fuera del conceyu como de Lena, Aller, Grao onde s’ encontraben componentes de L´Artusu o conocíos que s’ animaron.
L’ añu pasáu, anque nun había restricciones, nun se celebró San Xuan en Mieres como n’ años anteriores. Atopémonos na mesma situación o similar: nun diba haber enrame de fontes en Mieres. Asina que volvimos a repetir la mesma operación y ya así intentando asentar y contautar cola xente de barrios y pueblos onde s’ enramaron a mou de difundir l’interés del grupu por fomentar l’enramáu de les fontes nos pueblos y dir adulces intentado qu’asociaciones de vecinos, amigos o particulares… tomen rienda d’esta iniciativa y tornar al pueblu les costumes perdíes.
Esti 2022 vamos como Grupu L´Artusu a enramar en La Villa y esta vez ya sí, por tolo alto, con cancios al altu la lleva del enrame (¡gaita, acordión, tambor, bombu,…que nun falten!).
Esta selmana recordaremos a asociaciones de vecinos y demás que enramen en San Xuan o si nun tienen disponibilidad, seguiremos intentando enramar (simbólicamente) polo menos les de los dos años anteriores. Y si se pue, dalguna más; ya se verá ‘l tiempu del reló.
 |
| Una fonte enramá en Siana |
–L’ enrame de les fontes pareznos una tradición tan tradicional como artística. ¿Atópase, al so xuiciu, lo suficientemente reconocida y protexía?
Nello tamos. Sí ye verdá que cada añu n’ Asturies hai más sitios onde se recupera con fuercia.
Seguimos aportando‘l nuestru granín d’arena, intentando llegar a concienciar a los vecinos de lo importante d’esta tradición… onde convidamos al agua y al fueu a llimpianos, sananos… San Xuan y la so nueche son maxa… son enerxía bona.
–Más allá d’ enramando fontes, ¿ónde podremos atopar al Grupu L'Artusu en San Xuan de 2022?
Pues vamos tar na cai Fernández Cabeza la tarde nueche del 17 de xunu a partir de les 20:30 y el 23 de xunu en La Villa a les 20:00, a les 21:00 nel parque Xovellanos y a les 00:00 nel Ayuntamientu cantando la Danza prima depués de dos años de silenciu.
Comentarios
Publicar un comentario